Abstract: The human community is renewing itself with various restrictions. Human Sexual relations rules are based on community and cultural. This Novel indicates that human sexual behaviors and relationships are in harmony with the circumstances. This Novel given the message of all the feelings of frustrations, pains, and unstable living in the lives of “kithaari”.

Keywords: kithaari, human community, harmony, cultural, Novel, சு.தமிழ்ச்செல்வி, கீதாரி, நாவல், தகுபுணர்ச்சிக் கோட்பாடு.

யாருக்காகவும் பாசாங்கு செய்துகொள்ளாத எழுத்து சு.தமிழ்ச்செல்வியினுடையது. தனது எழுத்துப் பயணத்தில் தொடர்ந்து காத்திரமாகவே எழுதிவரும் சு.தமிழ்ச்செல்வி அவர்களின்  கீதாரி நாவலானது சமூகம் கட்டமைத்த பாலியல் ஒழுக்கங்களைக் கேள்வி கேட்கும் படைப்பாக அமைந்துள்ளது. பொதுவாகவே ஒரு சமூகம் தனக்கென தனிப்பட்ட  பாலியல் கோட்பாடுகளை வகுத்து அதன்படி மக்களை வாழ நிர்பந்திக்கும். அச்சமூகம் கட்டமைத்த கோட்பாடுகள் ஒரு படைப்பாளியின் எழுத்துக்களால் தகரும்போது அச்சத்தின் அதிர்வுகள் அனைவருக்குமானதாக இருக்கும். காரணம் அதுவரை தாங்கள் பின்பற்றி வந்த அல்லது பாதுகாத்து வந்த சிந்தனைக் கோட்பாடு அதனோடு தொடர்புடைய நடைமுறைப் பழக்கவழக்கங்கள் இனி தொடராது என்ற முடிபும் அதன் பயனாகத் தாங்கள் பாதுகாத்து வைத்திருந்த பெண் உடல்சார்ந்த புனைவுகள், பெண் உடல்மீது கட்டி எழுப்பப்பட்ட ஆணுக்கான உரிமை கட்டுமானங்கள் தகர்ந்துவிடும் என்பதால். இங்கு தகர்தல் என்பது ஆண் தனது அதிகாரத்தின் பிடியில் வைத்துப் பாதுகாத்த பெண்ணின் மீதான உரிமையின் தளர்வாகவும்  கொள்ளலாம்.

படைப்பாளி என்பவன்  சமூகம் தனக்கென எழுப்பி வைத்திருக்கும் கருத்துருவாக்கங்களில் குறுக்கும் நெடுக்குமாக பயணிப்பவன். சமூகத்தின் கடுமையான இருள்சூழ்ந்த மறைவான பக்கங்களில் பயணப்பட்டு அதனைப்பற்றிய பிம்பத்தைப்  பாரபட்சம் இன்றி வெளிப்படையாகப் பேசி கடும் அதிர்வுகளை எதார்த்தமான சமூகத்தின் முகமாக வெளிச்சமிட்டுக் காட்டிவிடுவான். அத்தகு அதிர்வுப் போக்கே கீதாரி நாவல் நெடுக இடம்பெற்றுள்ளது.

மானுடத்தை உயிர்ப்போடு வைத்திருக்க இயற்கையானது காமத்தைத் தொடர்ந்து பல்வேறு தளங்களில் பரிசோதித்துப் பார்த்துக்கொண்டே இருக்கின்றது. சுற்றியிருக்கும்  இயற்கை எவ்வகையிலேனும் ஒரு ஆண் தனக்கான பெண் உடலை அல்லது ஒரு பெண் தனக்கான ஆண் உடலைத் தேர்ந்தெடுத்துக்கொள்ளும் முடிவுநோக்கி நகர்த்தி விடுகின்றது. சுழலானது தனிமனிதனின் வரையறுக்கப்பட்ட பாலியல் தேவைகளைப் பகடிசெய்து  சமூகம் வகுத்த திசைக்கு எதிர்திசையில் பயணப்படவைத்து சமூக கட்டமைப்பை  அவ்வப்போது உடைத்துக் கொண்டிருக்கின்றது.

கீதாரி : மாற்றியமைக்கப்பட்ட தகுபுணர்ச்சிக் கோட்பாடு

கீதாரி நாவலானது மாற்றியமைக்கப்பட்ட தகுபுணர்ச்சிக் கோட்பாடு குறித்து வெளிப்படையாகப் பேசுகின்றது. ஒரு சமூகத்தின் பாலுறவு குறித்த கோட்பாடு யாருக்கானதாகப் புனையப்பட்டிருக்கும் என்ற கேள்விக்கு விடையாகக் கீதாரி நாவலானது  அமைந்துள்ளது. மேல்தட்டுச் சமூகம் கடைபிடிக்கும் பாலியல் உறவு குறித்த கருத்தாடல்களுக்கும், இடைநிலைச் சமூகமக்கள் பின்பற்றுகின்ற பாலுறவுக் கோட்பாட்டில் இருந்து முற்றிலும் வேறுபட்ட கருத்துருவாக்கத்தை நிலமற்ற, நகரும் நாடோடிக் குழுவினுள் காணமுடியும் என்பதை ஆட்டு மந்தைகளை ஓட்டிச்செல்லும் எதிர்த்துப்பேச இயலாத மக்களின் வாழ்வின் மூலம் சு.தமிழ்ச்செல்வி கட்டமைக்க முயலுகின்றார். எதிர்த்துப் பேசத் திராணி அற்ற, நாடோடிக் குழுவிற்கான உணர்வு நிலைகளை இயற்கை தன் கட்டுப்பாட்டில் வைத்திருக்கின்றது. இடம் மற்றும் பருவம் ஒரு குழுவை வழிநடத்திச் செல்வதை நாவலை வாசிக்கும் பொழுது உணரமுடிகின்றது.

யாவரிடமும் சொல்வதற்கென்று இருக்கும் இருள்சூழ்ந்த சொல்லப்படாத பக்கங்களைக் கதாப்பாத்திரங்களின் வழியே சமூகத்தின்முன் பார்வைக்கு வைக்கின்றார். சேது, ராமாயி, சிகப்பி, கரிச்சா,  வெள்ளைச்சாமி, சேர்வை, இருளாயி என நாவல் நெடுக பயணப்பட்டுக் கொண்டிருக்கும் எளிமையான கதாப்பாத்திரங்கள் வலிமையான முடிவுகளை எடுத்துக்கொண்டே உயிர்ப்பித்து இருத்தலுக்கான தேவையை நோக்கி இயற்கையானது  வழிநடத்திச் செல்வதைக் காணமுடிகின்றது.

சிகப்பியை வயதிற்கு வரும்வரை வளர்த்த சேது ‘தந்தை’ என்ற சொல்லாடலுக்கான சமூகத்தோடு இயங்கும்  முகத்தோடு தன் கடன் பணிசெய்து கிடைப்பதாகவே இருக்கின்றார். ஆனால் தந்தை வயதொத்த ‘சாம்பசிவம்’ எடுத்து வளர்க்கும் மகள் சிகப்பியுடன் வலுக்கட்டாயமாகக் கூடுவதென்பது தகாப்புணர்ச்சிக் கோட்பாட்டைத் தருவதாகவே கருதப்படுகின்றது. கரிச்சாவின் துணைக்கு இருக்கும் சித்தப்பா முறை (சேதுவால் எடுத்து வளர்க்கப்பட்ட) வெள்ளைச்சாமி கால ஓட்டத்தில் கணவனாக வருவது சமூக விதிகளுக்குப் பழகிய மனங்களுக்குப் பெரும் அதிர்வை வழங்குவதாக அமைகின்றது. சமூகத்தினால் பயிற்றுவிக்கப்பட்ட மக்களுக்குத் தனக்கான இணைதேடல் என்பது வரையறுக்கப்பட்ட ஒன்றாக அமைந்திருக்கும். ஆனால் சமூகத்திலிருந்து ஒதுங்கி உயிர்ப்பித்தலை மட்டுமே தலையாயக் கடனாகக் கொண்டு இடம் விட்டு இடம் நகரும் குழுவிற்குத் தனக்கான இணைதேடல் என்பது சவால் நிறைந்த ஒன்று. அத்தகு சவாலான சூழல்களில் இயற்கையானது சமூக விதிகளைப் பகடிசெய்யும் விதமாகப் புதுவித கட்டவிழ்ப்புகளை அல்லது ஆண், பெண் என்ற ஆதிமரபு நிலைப்பாட்டின் பாதையைத் தேர்ந்தெடுக்க வைப்பதைக் காணமுடிகின்றது.

சமூகம் கட்டமைத்த மனத்திற்கும் இயற்கை நிகழ்த்தும் உடலியல், மன மாறுதல்களுக்கும் இடைப்பட்ட மோதலை சு.தமிழ்ச்செல்வி கரிச்சா பருவமடையும் இரவு குறித்த கதையாடல் மூலம் நிகழ்த்திக் காண்பிக்கிறார். பேயிலுப்பை, தேனிலுப்பைப் பூ  இதழ்களை வறுத்து உண்ணுதல், மூல சூட்டுக்கு ஆமைக்கறி உண்ணவேண்டும் என்ற குறிப்பு மற்றும் நாவல் முழுக்க பழமொழி பயணப்பட்டுக் கொண்டிருப்பதைக் காணமுடிகின்றது.

தொடர்ந்து நகரும் இடையர்களின் வாழ்வியல் கூறுகளை எந்தவித பாசாங்குகளும்  இன்றி ஆவணமாகப் பதிந்துள்ளார் என்றே சொல்லலாம்.  திருமணச் சடங்கில் மாப்பிள்ளை தொலைவில் வேறு ஊரில் இருக்க கரிச்சாவிற்கு அருகில் மாப்பிள்ளையாக அலங்கரிக்கப்பட்ட இடையர்களின் “தடிக்கம்பை” சித்தப்பா என்று யாரும் அறியாமல் சொல்லி அழைத்தபடிக் கணவனாக ஏற்கும் சூழல் யாரும் எதிர்கொள்ளாத – அல்லது சமூகத்தால் ஏற்றுக்கொள்ள இயலாத சூழல் அமைவதும், அதன்பிறகான வாழ்க்கை தொடர்வதும் கோட்பாடுகள் அனைத்தும் அவ்வப்போது மாறுதலுக்குரியதே என்ற கருத்துருவாக்கத்தை சு.தமிழ்ச்செல்வி கட்டமைக்கின்றார் எனலாம்.

ஏதுமற்றவர்களின் நீதி என்றுமே மெளனம்தான் என்பதும் தொடர்ந்து நகரும் சமூகத்திற்கென்று இருக்கும் எடையற்ற பொருட்கள் (போகும் இடங்களில் அம்மி கடன் வாங்கும் நிலை), பழகிய பொருட்களை விட்டுவிட்டு வரும் சூழல், வழிதவறிப்போன ஆடுகளைத் திரும்ப ஒப்படைக்கும் ஊர்மக்கள், இரவு துக்கமற்ற இடையர்கள் வாழ்க்கை, அண்ணன் இறந்தபிறகு அவரின் மனைவியைத் தம்பிக்குக் கட்டிவைக்கும் பழக்கம், சபித்தல் தொடர்பான சடங்குகள், ராஜா வாய்க்கால் வழியாக அரிசி கொண்டுசெல்லுதல் என இடையர்கள் வாழ்வியலோடு கூடிய சடங்குகள் அனைத்தையும் சு.தமிழ்ச்செல்வி அவர்கள் தனது கீதாரி நாவலை எதார்த்த இயங்குதளத்திலிருந்து புனைந்துள்ளார்.

நூல்விவரம்

நாவல் பெயர் : கீதாரி

ஆசிரியர் : சு.தமிழ்ச்செல்வி

பதிப்பகம்: நியூ செஞ்சுரி புக் ஹவுஸ் (பி) லிட்., 41-பி, சிட்கோ இண்டஸ்ட்ரியல் எஸ்டேட், அம்பத்தூர், சென்னை – 600 098.

பக்கம்:175

விலை:115

பதிப்பு விவரம்: ​may 2017 (10th edition)

First Edition : Dec 2008

………………………………………………………………

முனைவர் அ.மரிய செபஸ்தியான்

உதவிப்பேராசிரியர் – தமிழ்

சமூக அறிவியல் மற்றும் மொழிகள் பள்ளி

வி.ஐ.டி. பல்கலைக்கழகம், வேலூர்.

[email protected]